By Koura Plus 
نشر نائب رئيس النادي الإفريقي الأستاذ حامد مبارك تدوينة عبر صفحته الخاصة على فايسبوك مساء اليوم الثلاثاء طالب فيها بتغيير تركيبة لجنة الإستئناف
وأعلنت الجامعة مساء أمس عن تركيبة اللجنة الوطنية للاستئناف برئاسة علي البجاوي.
وبحسب مبارك فإن تعيين البجاوي مخالف للفصل 64 من القانون الأساسي للجامعة والذي ينص على إلزامية عدم تقلد رئيس اللجنة لأي منصب في السنوات ال 4 التي تسبق تعيينه في الوقت الذي كان قد شغل منصب الكاتب العام للملعب التونسي نهاية سنة 2024.
و في ما يلي نص التدوينة :
نغير الصيغة من مرئي مسموع لا يعجب المتلقي إلى كتابة لعلها تعطي فرصة التمعن و التفكير قبل التعليق. قوانين اللعبة شيء مختلف عل القوانين المنظمة للعبة و يجب احترام القانون و على الجميع دون تفرقة.
نشرت الجامعة التونسية لكرة القدم على صفحتها الرسمية تركيبة لجنة الاستئناف و هاذي حاجة غالطة و فيها خرق للقانون و المبهت في الأمر انو خمسة اعضاء من المكتب الجامعي و خمسة أعضاء من اللجنة الجديدة يعني عشرة اشخاص الكلهم من اصحاب العلم و الخبرة و العمل و الاحتراف في مجال القانون.
على كل باش ما نطولش عليكم انشاء الله يتم شرح الموضوع في البلاتوات التلفزية و الإذاعية و لكن الله غالب المكتب الجامعي بمحاميه خرقو القانون و على هاذا الأساس نطلب منهم تغيير اللجنة بدون آجال و في اقرب وقت ممكن مع (هاذا المهم) احترام الفصل 64 من القانون الأساسي متاع الجامعة و راهو القانون الأساسي أنا خاطيني ما كتبتوش اما ملتزم بيه
طولت عليكم و نعتذر و عليه الفصل 64 يقول و بكل بساطة و بكل سهولة و اي مواطن تونسي يفهمو انو رئيس اللجنة يلزمو في الأربعة سنوات الاخيرة ما خدم لا في الهياكل و لا في رابطات و لا في نوادي و لكن للأسف الشديد المكتب الجامعي بترسانة المحامين نساو الفصل هاذا لانو السيد رئيس اللجنة عندو اربعة شهور تقريب ملي كان كاتب عام في جمعية معناها رئيس اللجنة لا يستجيب للشروط
شنوة نعملو ؟ يلزم تغيير رئيس اللجنة لأنو لا يستجيب للشروط
ملاحظة: TAS لا تعاقب على التصريحات اما التاريخ يعاقب على خزعبلات التسميات و إرضاءات و السادة و السيدات المحامين من المكتب الجامعي يعرفو القانون و يعرفو TAS
ملاحظة 2: زيدو ثبتو من باقي الأعضاء تمشيوش ما تثبتوش و غدوة نعاود نقلكم غالط و تقوليلي تصريح ناري
ملاحظة 3 :الرجاء التثبت من الملاحظة2
غدوة نعطيكم عواقب التسمية الغالطة معناها إذا قال المكتب الجامعي لا و اللجنة صحيحة و كذا و سي حامد هاذا باش نعاقبوه و نخطييوه راهي العواقب ما تليقش بتونس و بمكتب جامعي قاصد ربي يصلح في الكورة وً خاصة فيه ناس كانت تكتب في القانون و شدت لجنة القانون الكل
و كيما قال احد منخرطين النادي الافريقي الشهير
“كل شيء بالقانون”
ملتقانا غدوة و كل شيء بالقانون